डहाणू : डहाणू तालुक्यातील आसनगाव येथील कृषी विद्यालयाच्या वसतिगृहात १९ वर्षीय विद्यार्थिनीने आत्महत्या केल्याची धक्कादायक घटना सोमवारी सकाळी समोर आली. या घटनेमुळे विद्यालय परिसरात आणि विद्यार्थ्यांमध्ये खळबळ उडाली आहे.
मृत विद्यार्थिनीचे नाव रूपाली गावित असून ती मूळची जव्हार येथील रहिवासी होती. ती आसनगाव येथील कृषी विद्यालयात सेकंड इयर डिप्लोमाचे शिक्षण घेत होती आणि शिक्षणासाठी विद्यालयाच्या हॉस्टेलमध्ये राहत होती.
प्राथमिक माहितीनुसार, रूपाली काही दिवसांपासून मानसिक तणावात असल्याचे सांगितले जात आहे. मात्र, तिच्या आत्महत्येमागील नेमके कारण अद्याप स्पष्ट झालेले नाही.
घटनेची माहिती मिळताच वाणगाव पोलिसांनी घटनास्थळी धाव घेतली. पोलिसांनी घटनास्थळाचा पंचनामा करून तपास सुरू केला आहे. विद्यार्थिनीवर कोणताही दबाव होता का, तिच्या मानसिक तणावामागे नेमके कारण काय होते आणि घटनेपूर्वी तिचा कोणाशी संपर्क झाला होता का, या सर्व बाबींचा तपास केला जात आहे.
या प्रकरणाचा तपास वाणगाव पोलीस ठाण्याचे पोलीस निरीक्षक तुषार पाचपुते यांच्या मार्गदर्शनाखाली सुरू आहे. पोलिसांकडून विद्यार्थिनीचे सहकारी, शिक्षक आणि कुटुंबीयांकडूनही माहिती घेतली जाण्याची शक्यता आहे.
अवघ्या १९व्या वर्षी घडलेल्या या घटनेमुळे कुटुंबीयांवर दुःखाचा डोंगर कोसळला आहे. घरापासून दूर राहून शिक्षण घेणाऱ्या विद्यार्थ्यांच्या मानसिक आरोग्याचा आणि त्यांना वेळेवर समुपदेशन मिळण्याचा मुद्दाही या घटनेनंतर पुन्हा चर्चेत आला आहे.
दरम्यान, आत्महत्येचे नेमके कारण पोलिस तपासानंतरच स्पष्ट होणार असून, या प्रकरणी अधिकृत माहितीची प्रतीक्षा आहे.